БИШКЕК, 23-апр. — Sputnik. Немец коомдук ишмерлери Германия канцлери Олаф Шольцко ачык кат жолдоп, Украинага курал берүүнү токтотуу чакырыгы менен кайрылды. Бул туурасында Berliner Zeitung гезити жазгандыгын РИА Новости билдирди.
Анда курал менен камсыздоо чатакты созуп жана дипломатиялык жол менен абалды жөндөөгө мүмкүнчүлүк бербей жаткандыгы белгиленген.
Кайрылууну профессорлор, илимдин докторлору, музыканттар, публицисттерден турган 19 киши жолдогон, алардын арасында бундестагдын мурдагы вице-президенти Антье Фоллмер жана БУУнун башкы катчысынын мурдагы жардамчысы Ганс-Кристоф фон Шпонек бар экени айтылды.
"Германия жана НАТОнун башка өлкөлөрү курал жиберип өзүңөрдү де-факто түрүндө чатактын бир тарабына айлантып алдыңар. Ошентип Украина Европадагы коопсуздук тартиби боюнча жылдар бою улам курчуп келе жаткан НАТО менен Россиянын каршылашуусунун согуш талаасына айланып калды", — деп жазылган катта.
Демилге тобунун авторлорунун пикиринде, Батыш өлкөлөрү Москванын да кызыкчылыгын карашы керек. Андан сырткары, Түндүк атлантика альянсына кирген мамлекеттер коопсуздук боюнча Россия жана анын коңшуларына сунуш менен өздөрү барышы зарыл.
"Биз Германиянын өкмөтүнө, ЕБ өлкөлөрүнө жана НАТОго украин аскерлерине курал берүүнү токтотуу туурасында өтүнүч кылабыз. Курал менен камсыздоонун ордуна Киев өкмөтүн каршылыктарын токтотууга, согуш отун тутандырбоо боюнча сүйлөшүүлөргө кепилдик берип, саясий абалды жөндөө үчүн кадам таштоого чакырабыз. Президент Зеленский менен талкууланып, Москвага берилген сунуш — боло турган нейтралитет, Крымды таануу боюнча макулдашуу жана Донбасстын келечектеги статусу боюнча референдумдар муну жасоого реалдуу мүмкүнчүлүк берет", — деп ишендирген кайрылуунун авторлору.
Буга чейин Шольц Берлин Киевге өзүнүн аскер системасынан берүү мүмкүнчүлүгүн негизинен түгөткөндүгүн билдирген. Анын айтымында, эми бундесвер бүт көңүлүн коргонуу мүмкүнчүлүктөрүн бекемдөөгө топтойт.