БИШКЕК, 23-апр. — Sputnik. Кыргызстандык спортчу Айсулуу Тыныбекова Азия чемпионатынын финалында жаракат алган бутун көрсөттү.
Ал социалдык тармактагы баракчасына видео чыгарып, "до свадьбы заживёт" (маанилүү иштерге чейин айыгат) деп жазган.
Кыргызстандык балбан кечээ кечинде дагы пост жазып, Азия чемпионатынын финалында япониялык Нонока Озакиге кандайча жеңилип калганын айткан.
Тыныбекова килемде 62 килограмм салмактагылар арасында кармашкан. Ал алтын үчүн кармашка чейин чейрек финалда монголиялык Болдсайханы Хонгорзулгулду 7:3 упай эсебинде, жарым финалда өзбекстандык Набира Эсенбаеваны 6:0 упай менен жеңген.
Айсулуу Тыныбекова буга чейин Азиянын төрт жолку чемпиону болгон.