БИШКЕК, 22-апр. — Sputnik. Кыргызстандык балбан Айсулуу Тыныбекова Монголияда болуп жаткан Азия чемпионатынын финалына чыкты.
Азиянын күчтүү балбандары катышкан мелдеш Улан-Батор шаарында уланууда.
Тыныбекова килемде 62 килограмм салмактагылар арасында кармашат. Ал чейрек финалда монголиялык Болдсайханы Хонгорзулгулду 7:3 упай эсебинде, жарым финалда өзбекстандык Набира Эсенбаеваны 6:0 упай менен жеңди.
Алтын үчүн Нонока Озаки менен кармашат. Финалдык беттеш бүгүн 16:00дө старт алат.
Кечээ Азия чемпионатынан Айпери Медет кызы (76 кг) алтын, Мээрим Жуманазарова (68 кг) күмүш алган. Алар Тыныбековадан айырмаланып олимпиадалык эмес, айлампа системасында кармашкан.