БИШКЕК, 21-апр. — Sputnik. Ботаникалык бакты бирөө атайылап өрттөбөйт, селсаяктар жылыныш үчүн таштанды күйгүзүп жатат. Бул тууралуу ЖК депутаты Шаирбек Ташиев билдирди.
Парламентте "Ботаникалык бакты сактоо жана өнүктүрүү жөнүндө" токтом долбоору каралды.
Ташиев бул бакчанын жанында жашаарын, ал жерде күнүгө чуркай турганын белгиледи. Ошондой эле бул токтом менен эч нерсе өзгөрбөй турганын айтты.
"Ал жерде жунглиге окшоп ичине кире албайсың, чыга албайсың. "Бирөө келип өрттөп жатат" деп жатышат. Эч ким өрт койгон жок. Селсаяктар келип эле жылыныш үчүн от жагат. Анан ошол жерге таштанды толуп кеткен. Таштанды күйсө эле Ботаникалык бак өрттөндү деп жатасыңар. Бакча өзү өрттөнгөн жок. Экинчиден, ал жерде канчалаган бош жер турат, быйыл көчөт эккениңерди көргөн жокмун. Канча арыктар тазаланбай жатат. Кээ бир депутаттар сиздин (бакчанын жетекчисинин — ред.) администрацияңызга кирет экен. Мен кирбей эле айланып чуркап кетем", — деди Ташиев.
Токтом долбоорунун демилгечиси Дастан Бекешев муну менен министрлер кабинетине тапшырма берип, бакчаны өркүндөтүү пландары сунушталып жатканын белгиледи. Ошондой эле Ботаникалык бакты мэрия өзүнө өткөрүп алууга аракет кылууда, аны Илимдер академиясынын балансында калтыруу каралган.
Андан соң эл өкүлү Улугбек Ормонов былтыр бакчанын 27 жерине өрт коюлганын айтып, ал жөндөн-жөн эле күйүп кетпейт деген пикирин билдирди.