Энергетика тармагында технологиялар жылдан-жылга тездик менен өнүгүп, күн, шамал, геотермалдык булактарды колдонуу аркылуу энергия алууга жакшы шарттар түзүлдү. Бул тууралуу Нурзат Абдырасулова Sputnik Кыргызстан радиосунда маек куруп жатып билдирди.
Анын айтымында, күн нурунан электр энергиясын өндүрүүдө экологияга зыян келтирбегендей шарт сакталышы абзел.
"Биз кичинекей мамлекет болгонубуз менен климаттын өзгөрүүсүнө чоң салым кошо алабыз. Бул боюнча Кыргызстан Париж келишимине да кол койгон. Бүгүнкү күндө жашыл экономикага инвестиция салууга кызыккандар көбөйдү. Алсак, коңшу Кытай күн панелдерин чыгарууда лидер. Өлкө энергиянын кайра жаралуучу булактарын колдонууда энергетикалык балансты сактоо жаатында артта калды. Ал жалпы салттуу энергия булактарын алганда бир пайызга да жетпейт. Ага карабастан өлкөдө суу, күн энергиясынын потенциалы чоң экени белгилүү. Энергетика тармагында технологиялар жылдан-жылга тездик менен өнүгүп, күн, шамал, геотермалдык булактарды колдонуу аркылуу энергия алууга жакшы шарттар түзүлдү. Буларды эске алганда энергетикалык коопсуздук маселесин чечүүгө мүмкүнчүлүктөр бар", — деди Абдырасулова.
Ошондой эле адис энергиянын кайра жаралуучу булактарын колдонуп электр станцияларын курууда ички инвесторлорго көңүл буруп, баа саясатын туура жүргүзүү иштерине басым жасоо керектигин кошумчалады.