БИШКЕК, 21-апр. — Sputnik. Кыргызстандын белгилүү балбандары Мээрим Жуманазарова менен Айпери Медет кызы Монголияда өтүп жаткан Азия чемпионатынын финалына чыкты.
Мелдеш ушул тапта Улан-Батор шаарында өтүүдө. Бүгүн кыз-келиндер күрөшү башталды.
Жуманазарованын салмагында (68 кг) жети кыз ат салышууда. Алар эки топко бөлүнгөн. Мээрим биринчи турда казакстандык Мадина Бакбергенованы 5:0, экинчи турда кореялык Суджин Пакты 10:0, ал эми жарым финалда Энхсайханы Дэлгэрмааны 7:2 упай эсеби менен жеңген. Алтын үчүн кармашта кайра казак балбаны Мадина Бакбергенова менен кармашат.
Айпери Медет кызынын салмагындагы (76) кыздар дагы эки топко бөлүнгөн. Кыргызстандык балбан биринчи турда Юка Кагамини 7:3, экинчи турда индиялык Судеш Кумарини 11:0, жарым финалда болсо монголиялык Ариунджаргал Ганбатты 10:0 упай эсеби менен уткан. Финалда кайра япониялык Юка Кагами менен туш келет.
Жыйынтыктоочу кармаштар бүгүн саат 16:00дө башталат.
Белгилей кетсек, эртең 62 килограмм салмактагылар арасында Айсулуу Тыныбекова күрөшөт. Чоңдор арасындагы Азия чемпионатына бул жылы үч спортчу кыз жөнөтүлгөн.
Монголиядагы Азия чемпионаты 24-апрелде аяктайт. Кечээ грек-рим күрөшүнүн балбандары күрөшүп бүттү. Жалпы командалык эсеп боюнча үчүнчү орунду алды. Жеке эсепте Жоламан Шаршенбеков (60 кг), Тынар Шаршенбеков (63 кг), Акжол Махмудов (77 кг) алтын, ал эми коло медалды Адилхан Нурланбеков (72 кг), Үзүр Жузупбеков (97 кг), Роман Ким (130 кг) алды.
Кыздар күрөшүп бүткөндөн кийин эркин күрөш боюнча кармаштар башталат.