БИШКЕК, 19-апр. — Sputnik. Президент Садыр Жапаров расмий сапар менен Азербайжандын борбору Баку шаарына келди. Бул тууралуу мамлекет башчынын маалымат кызматы билдирди.
Өлкө башчынын учагы Гейдар Алиев атындагы эл аралык аэропортко конду. Аба майдандын флагштокторуна эки өлкөнүн мамлекеттик желектери илинип, Ардак кароолдун ротасы тизилген.
Жапаровду ким тосуп алганы тууралуу жазылган эмес.
Расмий сапар эки күнгө созулат. Анын алкагында президент Садыр Жапаров Азербайжандын президенти Ильхам Алиев менен эки тараптуу сүйлөшүүлөрдү жүргүзүп, Милли Межлистин төрайымы Сахиба Гафарова жана ишкер чөйрөнүн өкүлдөрү менен жолугушат.