БИШКЕК, 19-апр. — Sputnik. Казакстан Кыргызстан менен күч түзүм кызматкерлеринин бири-биринин аймагында жүрүшү боюнча келишимден чыгууну пландап жатат. Президенттин тиешелүү жарлыгы Open NLA порталы аркылуу коомдук талкууга коюлду.
Эске салсак, 1997-жылдын 8-апрелинде Казакстан менен Кыргызстан өкмөтү эки өлкөнүн тең аймагында бири-биринин укук коргоо жана атайын органдарынын жүрүшү боюнча келишим түзүлгөн.
Документке ылайык, тараптар бири-биринин аймагында кылмышка шектүүлөрдү жана качкандарды кармоо, сот жообуна тартуу жана аңдуу жүргүзүүгө укуктуу. Болгону күч органдары келген өлкөнүн мыйзамдарына баш ийип, кесиптештеринен операция жүргүзүүгө уруксат сурашы керек. Ал эми тиешелүү органдар камакка алынган адамдарды өткөрүп берүүгө жана өлкө аймагы аркылуу ташылып жаткан баалуу жүктөрдү коштоп жүрүүгө милдеттүү. Курал жана атайын техника менен операцияларды жүргүзүүгө уруксат берилет. Кармоо учурунда куугунтуктоочулар куралды жана атайын техниканы колдонууга, кармалгандарды текшерүүгө, жеке буюмдарын жана документтерин тартып ала алышат. Кабыл алуучу мамлекет кесиптештерин турак жай жана эмгек шарттары менен камсыз кылат. Коопсуздук күчтөрү курал-жарак, атайын техникаларды жана ок-дарыны өздөрү менен алып кетүүгө милдеттүү.
Ар бир тарап келишимден чыгууга алты ай калганда экинчи тарапка жазуу жүзүндө билдирүү жөнөтүшү керек.
Макулдашуу болгон 1997-жылдан бери коңшу өлкөнүн мамлекеттик органдарында көптөгөн өзгөрүүлөр болуп, мыйзамдар ага кайра ылайыкташпаганы айтылат.
Ошондой эле укук коргоо орган кызматкерлеринин КМШга мүчө мамлекеттердин аймагында иш алып баруусу азыр башка келишим менен жөнгө салынат. Андыктан сөз болуп жаткан келишим актуалдуулугун жоготту деп саналат.