БИШКЕК, 18-апр. – Sputnik. Бишкекте 18 жаштагы кыз 39 жаштагы эркек кишини сабап салган. Бул тууралуу Ленин райондук ИИБ билдирди.
Соцтармакка Кулиев көчөсүндө аял жерде жаткан кишини сабап жаткан видео тараган.
Милициядан билдиришкендей, 17-апрель күнү кечинде оор жаракат алган киши Улуттук госпиталга жеткирилгени тууралуу маалымат түшкөн.
"Жабырлануучу тартип сакчыларга ошол түнү саат 00:30дар чамасында Кулиев менен Рыскулов көчөлөрүнүн кесилишинде бейтааныш аял менен айтыша кетип андан таяк жегенин айткан. Киши мас болгон жана арыз жазуудан баш тарткан", — деп айтылат маалыматта.
Укук коргоочулар кызды милицияга жеткиришкен. Ал дагы мас абалында болгону аныкталды. Тергөө амалдары жүргүзүлүп жатат.