БИШКЕК, 16-апр. — Sputnik. 20-25-апрель күндөрү Кыргызстанда Салттуу музыка жумалыгы жана IX эл аралык музыка, бий конгресси өтөт. Бул тууралуу Маданият, маалымат, спорт жана жаштар саясаты министрлиги кабарлады.
Билдирмеге караганда, иш-чараны министрлик менен "Кыргыздын салттуу музыкасы" фонду уюштурат.
"Жумалык маданий жана илимий бөлүктөн туруп, анын алкагында IX эл аралык музыка, бий конгресси, "Күү күнү", "Ыр күнү", "Дастан күндөрү" өтүп, ар бир бөлүк мастер-класстар менен коштолот. Ошондой эле Кыргыз улуттук академиялык драма театрында "Коркут-Ата" спектакли көрсөтүлүп, окуу жайларда салттуу музыкалык искусствонун окутулушу боюнча тегерек столдор, музыкалык окуу жайлардын отчеттук концерти жана "Улут наркы" көргөзмө-жарманкеси уюштурулат", — деп айтылат маалыматта.
Маданий саамалыкта төкмө акын Замирбек Үсөнбаев менен комузчу Сааданбай Шабданов мастер-класс өтүп, салттуу музыкалык искусствонун айтуучулук багыты боюнча "Манас" театрынын манасчы, дастанчы, акындарынын концерти тартуулана турганы маалым болду.
"Жумалыктын башталышы салттуу музыка өнөрүн алып жүрүүчүлөрдүн жөө жүрүшү менен башталып, расмий бөлүгү 25-апрель күнү гала-концерт менен жыйынтыкталат", — деп жазылат билдирмеде.
Иш-чарага Казакстан, Түркия, Өзбекстан, Азербайжан, Россиянын Алтай жана Тыва республикаларынын өкүлдөрү катышары күтүлүүдө. Венгрия, Италия, Улуу Британия, Индия жана Бангладеш өлкөлөрүнүн өкүлдөрү илимий багытта өтө турган конгресске онлайн-форматта катышары айтылды.