БИШКЕК, 16-апр. — Sputnik. Бишкектеги штамп заводунун (БШЗ) Түркияга ок-дары жеткирүү боюнча эч кандай келишими жок. Бул тууралуу ишкананын директорунун биринчи орун басары Алмаз Акматалиев Sputnik агенттигине билдирди.
Буга чейин интернетте польшалык компаниянын өтүнүчү менен Түркиядан шашылыш буйрук түшкөнү тууралуу маалымат тараган. Картридждерди Түркия аркылуу Польшага, андан соң Украинага жөнөтүү пландалып жатканы айтылган. Көп өтпөй ишканага ээлик кылган Мамлекеттик мүлктү башкаруу фондунун жетекчиси Мирлан Бакиров маалыматты төгүндөгөн.
Акматалиев да мындай буюртманын жок экенин тастыктады. Анын айтымында, завод спорттук жана аңчылык патрондорун чыгаруу боюнча башка мамлекеттер менен келишим түзгөн.
"Бизде бир дагы түрк фирмасы менен ок-дары боюнча келишим жок", — деди ал.
Ошондой эле жетекчилик негизи эле согуштук ок-дары жана жеткирүү боюнча эч ким менен келишим түзүлбөгөнүн кошумчалады.