БИШКЕК, 15-апр. — Sputnik. Бишкек мэриясы "Тазалык" муниципалдык ишканасынын кызматкерлеринин митингге чыгышы боюнча үн катты.
Муниципалитет ишкананын кээ бир кызматкерлери мурдагы жетекчисин кайра дайындоо талабын коюп жатканын айтты. ЖМКлардын жазганына караганда, жумушчулар азыркы жетекчиликтин айлыкты кечиктиргенине жана техниканын тетиктерине акча бөлбөгөнүнө нааразы.
Бирок мэрия мурунку жетекчиликтин 2019-2020-жылдагы ишинде мыйзам бузуулар аныкталганын, текшерүүнү Эсеп палатасы жана Бишкек мэриясынын ички аудит башкармалыгы жүргүзгөнүн билдирди.
Эсеп палатасынын текшерүүсүнүн жыйынтыгында абоненттер менен иштөөдө мамлекетке 7 миллион 339 миң 300 сом зыян келгени маалым болгон. Ошондой эле тейлөө кызматкерлерине кошумча төлөмдөрдү берүү жаатында 42 миллион 321 миң 900 сомдук мыйзам бузуу аныкталган, бул каражат сметада каралган эмес.
Ошондой эле "Мамлекеттик сатып алуулар жөнүндө" мыйзамдын талаптары бузулган, дал келбеген сумма 35 миллион 348 миң 300 сомду түзгөн. Мэрия чара көрө турганын айтты.
Мындан тышкары, ички аудиттик текшерүүнүн жыйынтыгы боюнча 54 миллион 882 миң сомдук мыйзам бузуу аныкталган.
Анын ичинде:
25,8 миллион сом — келишимдерди негизсиз түзүү, мыйзамсыз өткөрүлгөн конкурс, аванстык төлөмдөр жана башкалар;
15,7 миллион — негизсиз сый акы төлөө;
6,1 миллион — күйүүчү-майлоочу материалдарды негизсиз эсептен чыгаруу;
4,5 миллион — негизсиз орнотулган жана иштен чыгарылган тетиктер;
1,2 миллион — товардык-материалдык баалуулуктардын жетишсиздиги;
455 миң сом — каражатты негизсиз эсептен чыгаруу.
Толук тизмени мэрия көрсөткөн эмес.
Материалдар укук коргоо органдарына жөнөтүлгөн.
Мэрия "Тазалык" муниципалдык ишканасынын кызматкерлерин кызматтык милдеттерин аткарууга жана чагымчылдыкка алдырбоого чакырган.