БИШКЕК, 14-апр. — Sputnik. 9-майда Бишкектеги "Жеңиш" аянтында Улуу Ата Мекендик согуштун жеңишинин 77 жылдыгына арналган митинг-реквием өтөт. Бул тууралуу Коргоо министрлигинин маалымат кызматы кабарлады.
Иш-чарага согуштун ардагерлери жана ооруктун эмгекчилери, ардагерлер уюмунун, чет мамлекеттердин аскердик-дипломатиялык корпусунун өкүлдөрү, ошондой эле борбордун тургундары жана коноктору катышат.
Иш-чаранын жүрүшүндө гүлчамбар коюу аземи болот. Мындан сырткары, согуш учурун эске салган "жоокер боткосу" уюштурулуп, "Өлбөс полктун" жүрүшү болот.
Буга чейин министрлик 9-майда салтанаттуу аскердик жүрүш өтө турганын айткан. Анда өлкөнүн башкы аянтында ички аскерлер, милиционерлер, чек арачылар жана министрликтин Бишкек гарнизонунун аскерлери басышат.