БИШКЕК, 13-апр. — Sputnik. 13-апрель түнү Кыргызстан менен Тажикстандын чек ара делегациялары жолугуп, бир катар маселелерди макулдашты. Бул тууралуу УКМКнын Чек ара кызматы билдирди.
Ага ылайык, кыргыз-тажик чек арасында учурда абал салыштырмалуу туруктуу. Атышуу токтогондон кийин түн тынч өткөн.
"Түнкү саат 03:00дөн 03:55ке чейин "Кулунду" өткөрүү жайы менен "Овчи-Калача" (Тажикстан) өткөрүү жайында эки тараптын чек ара делегациялары жана күч түзүмдөрүнүн жетекчилери сүйлөшүүлөрдү жүргүздү", — деп айтылат маалыматта.
Сүйлөшүүнүн жүрүшүндө тараптар макулдашкан маселелер:
Чыр болгон жерден кошумча күч жана каражатты алып кетүүнү көзөмөлдөө. Бул чечим кабыл алынары менен 12-апрелде кошумча жеке түзүм менен аскердик техника алына баштаган.
13-апрель саат 11:00дө Баткен облусунун Лейлек районунун Селкан жерлигинде (чыр-чатак чыккан жер) эки мамлекеттин кеңейтилген курамынын жолугушуусун өткөрүү.
Чек ара кызматынын Баткен облусундагы түзүмдөрү күчөтүлгөн тартипте иштөөгө өткөнү айтылып, чек арачылар кырдаалга көз салып, көзөмөлдөп турары кошумчаланды.
Эске салсак, 12-апрелде тажик чек арачылары кыргыз чек арачыларынын эскертүүсүнө карабай Кыргызстандын аймагына кирип, жыйынтыгында ок атылган. Бирок эки тараптын чек ара кызматтарынын өкүлдөрүнүн сүйлөшүүсүнөн кийин атышуу токтотулганы, кырдаал туруктуу экени айтылган. Кийинчерээк кайрадан атышуу болуп, тажик тарап Кыргызстандын Достук айылын миномёт менен аткылай баштаганы кабарланган.
Тажик тарап кыргыз айылын миномёт менен атуусун токтоткон соң Баткен районунун Радар-1 жеринде турган Кыргызстандын чек арачыларына ок чыгара баштаган.
13-апрелге караган түнү Лейлек районуна караштуу Кыргыз-Встреч аймагында кыргыз-тажик чек арасындагы абал талкууланып, тараптар чатак чыккан жерден кошумча каражаттарын ала баштаган. Чек арага жакын жайгашкан айылдын эли өз унаалары менен үйлөрүн таштап кетип жатканы да айтылган.