БИШКЕК, 12-апр. — Sputnik. 2022-жылдын баштапкы үч айында Кыргызстанда финансылык пирамида боюнча 577 кылмыш иши катталган. Алардын ичинен 339у сотко жиберилгенин ИИМдин Тергөө кызматынын тергөөчүсү Айбек Жетигенов билдирди.
Ал Sputnik Кыргызстан агенттигинин маалымат борборунда өткөн "Турак жай кооперативиби же финансылык пирамидабы? Канткенде шылуундардын курмандыгы болбойбуз" деген аталыштагы тегерек столго катышкан.
Тергөөчүнүн айтымында, учурда мындай жол менен алданып, арыз менен кайрылгандар көбөйүүдө.
"Жыл башынан бери 577 кылмыш катталып, 339у сотко жиберилди. Азыр 200дөн ашык иш тергелип жатат. Арыз жазгандардын саны күн сайын өсүүдө", — деди Жетигенов.
Ал мындай иштердин кесепетинен элге 156 миллион 225 миң сом жана 27 миң доллар чыгым келтирилгенин, анын ичинен 130 миң сому гана ээсине кайтарылганын белгиледи.