БИШКЕК, 12-апр. — Sputnik. Тажик тарап кыргыз айылдарын миномёт менен аткылоону токтотуп, эми Баткен районунун Радар-1 жерлигинде турган Кыргызстандын чек арачыларына ок чыгарууда. Бул тууралуу УКМКнын Чек ара кызматы билдирди.
Чек ара кызматы саат 23:15ке карата кыргыз-тажик чек арасында кырдаал чыңалган бойдон турганын маалымдады.
"Тажик тарап кыргыз айылдарын миномёт менен аткылоону токтотуп, саат 22:50дөн тарта Баткен районунун Радар-1 жерлигинде турган Кыргызстандын чек арачыларын аткылап жатат. Мындан тышкары, чыр-чатак болгон жерге тажик тарап кошумча күч жана каражат тарта баштаганы аныкталды", — деп жазылат маалыматта.
Кыргызстандын Чек ара кызматынын жана башка күч түзүмдөрүнүн иш-аракетин координациялоо максатында жеринде Чек ара кызматынын жетекчиси генерал-майор Уларбек Шаршеев иштеп жатканы кошумчаланды.
Кыргызстандын Чек ара кызматы кырдаалды турукташтыруу үчүн бардык чараларды көрүүдө.
Эске салсак, бүгүн, 12-апрелде, тажик чек арачылары кыргыз чек арачыларынын эскертүүсүнө карабай Кыргызстандын аймагына кирип, жыйынтыгында ок атышуу болгон. Бирок эки тараптын чек ара өкүлдөрүнүн сүйлөшүүсүнөн кийин атышуу токтотулганы, кырдаал туруктуу экени айтылган. Кийинчерээк кайрадан атышуу болуп, тажик тарап Кыргызстандын Достук айылын миномёт менен аткылай баштаганы кабарланган.
Чек ара кызматынын акыркы маалыматы боюнча, тажик тарап кыргыз айылын миномёт менен атуусун токтотту. Чыр-чатактан Кыргызстандын бир аскери жабыркаган. Учурда анын абалы оор экени, операцияга даярдалып жатканы айтылды. Чек арага жакын жайгашкан айылдын эли өз унаалары менен үйлөрүн таштап кетүүдө.