БИШКЕК, 11-апр. — Sputnik. Коргоо министрлиги Социалдык фонддун пенсия курагына келип, бирок иштеп айлык алган аскер кызматкерлерине пенсия бербей туруу сунушуна каршы чыкты.
Министрлик социалдык баракчасы аркылуу Соцфондго жооп берип, көтөргөн демилгесин акылга сыйгыс, кыргыз аскерлерин сыйлабагандык деп сыпаттады.
Анда төмөнкүдөй жүйөлөр келтирилген:
Аскер кызматчылары иштебейт, кызмат өтөйт. Куралдуу күчтөрдүн өздүк курамынын 80 пайызы татаал климаттык жана бийик тоолуу шартта жан аябай кызмат кылып, ошол эле учурда жарандардын тынч иштешин камсыз кылат.
Кызматтык убактысы күнүнө 10-12 (жумасына 60-80 саат), кээде 24 саат болуп кетет. Өздүк курамдын кээ бир бөлүктөрү дем алыш жана майрам күндөрү дагы кызматта турат. Ал эми Социалдык фонддун кызматкерлери күнүнө 8 саат, жумасына 40 саат иштейт, эки күн дем алышат.
Россия, Казакстан жана Өзбекстандын аскер кызматчыларынын пенсиясын эсептөө боюнча берген маалыматы объективдүү эмес. Бир жактуу маалыматтарды таратуу менен элди адаштырып жатышат. Алардын аскер кызматчыларынын пенсиясы бизден алда канча жогору.
Социалдык фонддун кызматкерлерине Баткен, Маргун, Нарын же Караколдогу аскер бөлүктөрүбүзгө барып, алардын жашоо жана кызмат шарттары менен таанышып, өздөрүнүн ишине салыштырып көрүүнү сунуштайбыз.
Социалдык фонддун директорунун орун басары жогорку трибунадан Кыргызстандын аскер кызматчыларынын социалдык-экономикалык абалын начарлатууну талап кылууда. Социалдык фонд болуп саналган мамлекеттик түзүмдүн мындай мамилесин мамлекеттик деп атоого болобу? (суроо риторикалык гана).
Кыргызстандын бардык жетекчилиги, өкмөт жана биринчи кезекте президент аскер кызматчыларына бардык шарттарды түзүп, күжүрмөн даярдыгынын деңгээлин жогорулатуу боюнча аракет жасайт. Ошол эле учурда Социалдык фонддун жетекчилиги бул аракеттердин бардыгын жокко чыгарып жатат.
Аскердик коопсуздукту камсыз кылууга олуттуу зыян келтирет жана аскердик тармактагы мамлекеттик саясатка жана аскер кызматчыларын социалдык коргоосуна каршы келет.