БИШКЕК, 10-апр. — Sputnik. Батыштын журналисттери жарыялаган сүрөттөр Краматорскиге сокку урган "Точка-У" ракетасы Украинаныкы экенин далилдеп турат. Муну Донецкинин "Юнион" телеканалы жана бир нече Telegram-каналдар байкашканын РИА Новости жазды.
"Интернетте жакында эле Краматорскинин бекетине кулаган "Точка-У" ракетасынын сериялык номери пайда болду. 9М79-1 ракетасы, сериялык номери: Ш91579. Буга чейин Украинанын согушкерлери ушул эле сериянын ракеталарын колдонушкан", — деп айтылат https://t.me/TK_Union/13092
Посттун авторлору Украина Куралдуу күчтөрүнүн балансындагы башка да ракеталарды санап берген. Анын экөө 2015-жылы Алчевск менен Логвиноводо, калганы Бердянск менен Мелитополдо колдонулганын айтышкан.
"Краматорскиде ондогон жай тургундарды өлтүргөн "Точка-У" ракетасынын номери Украинанын Куралдуу күчтөрүнүн ракеталарынын сериясы менен дал келүүдө", — деп жазган Раданын мурдагы депутаты Илья Кива Telegram каналында.
Мындан тышкары, айрымдар Украина видеолордо "Точка-У" ракетасынын номерин жаап койгонун байкашкан. Бирок башка чет өлкөлүк телеканалдардын эфирлеринде номер так көрсөтүлгөн.
Донецк Эл Республикасынын башчысы Денис Пушилиндин айтымында, Краматорскидеги темир жол бекетиндеги чагымчылыктан 50 адам көз жумган. Анын бешөө — бала.
Белгилей кетсек, 8-апрелде Украинанын Краматорск шаарынын темир жол бекетине "Точка-У" ракетасы түшүп, 30дай адам көз жумганы айтылган. Маалым болгондой, бир нече күндөн бери шаар тургундары ал жактан массалык түрдө кетип, бекетте күндө киши көп болуп жаткан.
Киев бул каргашага Россиянын тиешеси бар экенин айтып чыккан. Бирок РФтин Коргоо министрлиги маалымат чындыкка дал келбей турганын белгилеп, аны Украинанын кезектеги провокациясы деп атаган.
Россиянын Тышкы иштер министрлиги Краматорскиге жасаган сокку үчүн Киев жоопкерчиликтен кача албай турганын айткан.