БИШКЕК, 10-апр. — Sputnik. Бишкекте президент менен байланышым бар деп шаар тургунунан 44 миң доллар алып из суутуп кеткен киши кармалды. Бул тууралуу Свердлов РИИБдин маалымат кызматы кабарлады.
Шектүү
© Фото / пресс-служба УВД Свердловского района
Билдирмеге караганда, милицияга А.Т. аттуу шаар тургуну кайрылган. Жабырланган тараптын айтымында, "А" аттуу киши президент менен түз байланышы бар экенин айтып, "Сары-Өзөн" базарынан чоң жер участогун алабыз деп 44 миң доллар сураган. Акчаны алган соң убадасын аткарбай, белгисиз тарапка из жашырып кеткен.
Аталган факт Бирдиктүү реестрге катталып, Кылмыш кодексинин 209-беренеси ("Алдамчылык") боюнча кылмыш иши козголгон.
"Тергөө иштеринен кийин кылмышка шектелип 30 жаштагы А.А аттуу адам кармалып, ШИИБдин убактылуу кармоочу жайына киргизилди", — деп айтылат маалыматта.
Милиция алдамчылардан жабыркагандар же алар тууралуу кандайдыр бир маалыматы барлар 0 505 55-15-85, 0 557 13-91-39, 0 312 43-28-15 жана 102 телефондоруна чалса болорун белгиледи.