БИШКЕК, 6-апр. — Sputnik. Ички иштер министринин орун басары Эркебек Аширходжаев Айзада Канатбек кызынын өлүмү боюнча жоопко тартылган милиционерлер эмненин негизинде кайра жумушка алынганын билдирди.
Парламенттин жыйынында Дастан Бекешев милиционерлердин кайра иштеп жатканын сынга алды.
"Ал окуядан кийин ички иштер органдарынын 30дан ашуун кызматкери тартиптик жазага тартылган. Алар ээлеген кызмат ордунан төмөндөтүү менен четтетилген. Мындай чара тартиптик устав боюнча жарым жылдан бир жылга чейин колдонулат. Кайра жумушка келсе мурдагы кызматынан төмөнкү тепкичке дайындалат", — деди Аширходжаев.
Ал эми УКМК төрагасынын биринчи орун басары ИИМ кызматкерлерине "Шалаакылык" беренеси боюнча козголгон кылмыш иши учурда тергелип жатканын, жыйынтыгы тууралуу өзүнчө маалымат берерин билдирди.
Айзаданын өлүмү
Өткөн жылдын 5-апрель күнү эртең менен Бишкекте үч жаран 27 жаштагы кызды автоунаага салып кеткен. Кыздын туугандары ошол эле күнү издеп баштап, Биринчи май райондук милицияга кайрылган. Бирок издөө иштери кечеңдеп жатканына нааразы болуп, эртеси ЖМКларга кабарлашкан.
7-апрелде изделип жаткан автоунаа Бишкектин чет жагындагы талаадан табылган. Ал тууралуу милицияга чабан кабар берген.
Автоунаанын ичинен киши колдуу болгон Айзада Канатбекованын жана 36 жаштагы кишинин бычакталган сөөгү табылган. Канатбекованы уурдаган Замирбек Теңизбаевге башында Жазык кодексинин 175-беренеси ("Адамды никеге туруу максатында уурдоо") менен иш козголуп, кийин 170-беренеге ("Адам уурдоо") өзгөртүлүп, андан соң 130-берене ("Киши өлтүрүү") кошулган. Бирок шектүү көз жумганына байланыштуу кылмыш иши токтотулган. Кызды ала качууга катыштыгы бар делип беш киши кармалган. Бешөө тең күнөөлүү деп табылып, экөө алты жыл алты айга, үчөө жети жылга эркинен ажыратылды.
Айзада Канатбекованын өлүмү боюнча кызматтык иликтөөнүн натыйжасында Бишкек ШИИБдин жана Биринчи май райондук милициясынын начальниктери баш болгон бир катар жетекчилер кызматтан алынган.