БИШКЕК, 5-апр. — Sputnik. Ысык-Көл биосфералык аймагынын дирекциясы Жайыт, балык чарба департаменти, Тоң балык заводу жана Кара-Талаа айылынын тургундары менен биргеликте сиг-лудога жана "ысыккөл" форелинин чабагын коё беришти. Бул туурасында дирекция кабарлады.
Ага ылайык, сиг-лудога балыгынын 5 миллион, "ысыккөл" форелинин 300 миң чабагы сууга коё берилген.
“Мындай демилге салтка айланып калды. Максаты — көлдүн суу бассейниндеги балык ресурсун толтуруу. Ушундай эле иш-чаралар менен балыктын эндемикалык түрлөрү, Кызыл китепке кирген — "ысыккөл" маринкасы, "ысыккөл" чабагы, карп, сазандар да көбөйтүлүүдө”, — деп айтылат маалыматта.
Жыл сайын белгилүү бир убакытта адистер Ысык-Көлгө балыктардын санын көбөйтүү үчүн миллиондогон чабактарды коё берет. Себеби көлдүн балык запасын калыбына келтирүү жана экосистеманы сактоодо бул маанилүү ролду ойнойт.