БИШКЕК, 5-апр. — Sputnik. Финансылык маселелер боюнча кеңешчи, ишкер Елена Парий кредиттин үстүнө кредит алгандарга карыздан жеңил кутулуунун жол-жобосун түшүндүрдү. Адистин кеңешин РИА Новости жазды.
Финансисттин айтымында, бир айлык кирешенин 30 пайыздан ашыгы кредитти төлөөгө кетип жатса, киши тынчсыздана башташы керек.
"Адам карызга белчесинен батып кеткенин моюндап, финансылык консультантка жардам сурап кайрылышы зарыл. Анткени мындай кырдаалга акча жагынан сабатсыз кишилер учурайт. Бул — көйгөй, аны чечүү керек, дарыгерге, юристке кайрылган сыяктуу эле маселе. Консультант сиздин абалыңызды анализдеп туруп, карыздан бат кутулуунун программасын түзүп берет", — деди Парий.
Ал эми андай шарты жокторго бардык кредит жана башка карыздарды тизмектеп туруп, алгач "кымбатынан" кутулууга аракет кылуу сунушталат. Башкача айтканда, үстөк пайызы көбүрөөгүнөн биринчи кутулуу зарыл. Аны канчалык созуп жүрө берсеңиз, үстүнө ошончо көп акча кошула берет. Ал эми андан биринчи кутулуу менен үнөмдөлгөн акчанын эсебинен майда-чүйдө береселерден кутулуп койсо болору айтылат.
Ошондой эле адис насыя алып жатканда шарттарын жана үстөк пайызын жакшылап кароо керектигин эскертет. Финансисттин айтымында, билип-билбей эле ай сайын негизги суммадан көбүрөөк акчаны пайыз катары төлөп жүргөн адамдар бар.