БИШКЕК, 4-апр. — Sputnik. Компания Centerra Gold Inc. Кыргызстандагы "Кыргыз алтын" ишканасындагы бизнес-активдерин сатууга макулдук бергендигин жана өлкөдөн кетерин жарыя кылды. Бул туурасында аталган компаниядан кабарлашты.
"Бул активдер "Кумтөр Голд Компани" жана "Кумтөр Оперейтинг Компани" деп аталган кыргызстандык туунду компаниялардыкы. Алар толугу менен Кумтөр кенин башкарып турган Centerra компаниясынын ээлигинде болгон", — деп айтылат маалыматта.
Билдирүүнүн тезистери:
Centerra канадалык компаниядагы “Кыргыз алтынга” тиешелүү акциялардын 26 пайызын алат да, андан соң аларды жок кылат;
"Кыргыз алтын" Centerra ишканасынын туунду эки компаниясынын 100 пайыз акцияларын жана алардын 36 миллион доллар көлөмүндөгү төлөмүн алат;
Кыргызстан менен "Кыргыз алтын" Кумтөр кени боюнча жоопкерчиликти толук өзүнө алат;
экологиялык, салык жана башка эскертмелер, андан сырткары, тараптардын соттук териштирүүлөрү келишим түзүлгөн соң 45 күндүн ичинде жок кылынат;
Centerra компаниясынын директорлор кеңешинен “Кыргыз алтын” ишканасынын эки өкүлү чакырып алынат;
Centerra Онтаринин Жогорку сотуна Теңгиз Бөлтүрүк боюнча берген доосу чакырып алынат.
Билдирүүдө канадалык компания “Кыргыз алтын” албай калган 2021-жылдагы үч квартал үчүн дивиденд, андан сырткары, Centerra менен анын КРдеги эки туунду компанияларынын фирма аралык балансын жана башка финансылык калыбына келтирүүчү каражаттарын төлөп берери айтылган.
Бүгүн президент Садыр Жапаров "Кумтөр" толук 100 пайыз акциясы менен Кыргызстандын ээлигине өткөндүгүн айтты.