БИШКЕК, 1-апр. — Sputnik. Россия жеке жактардын чет өлкөгө акча которуусун эки эсеге көбөйттү. РФтин борбордук банкы бул жаатта жеңилдик бергенин РИА Новости кабарлады.
Билдирмеге караганда, эми жеке тарап бир айдын ичинде Россия банкындагы өзүнүн эсебинен чет жактагы өзүнүн же башка бирөөнүн эсебине 10 миң доллардан ашпаган сумманы которо алат.
"Эгер жеке тараптын өз эсеби жок болсо, анда акча которгон компаниялар аркылуу беш миң доллардан ашпаган каражат жөнөтсө болот", — деп айтылат маалыматта.
"Бул нормалар санкцияларды колдобогон мамлекеттердин резиденттерине жана резидент эместерине тиешелүү. Ошондой эле бул мүмкүнчүлүктөн Россияда эмгек келишими менен иштеген бардык мамлекеттердин резидент эместери да колдоно алат", — деп айтылат маалыматта.
Жаңы лимит жарым жылга чейин иштей турганы кошумчаланды. Акча которуунун суммасы чет элдик валютанын рублге карата расмий курсу менен эсептелет. Аны Россиянын башкы банкы бекитет. Ошол эле учурда Борбордук банк санкцияларды колдогон өлкөлөрдүн жеке жактарына банктык жана брокердик эсеп аркылуу акча которуусуна тыюу салган. Алар алты айга чейин акча которо алышпайт.
Белгилей кетсек, марттын башында Россиянын башкы банкы жеке жактар айына чет өлкөгө 5 миң доллардан ашпаган сумма гана которо алат деген чектөө киргизген.