БИШКЕК, 30-мар. — Sputnik. Россиянын президенти Владимир Путин Германиянын канцлери Олаф Шольц жана Италиянын премьер-министри Марио Драги менен телефон аркылуу сүйлөшүү маалында газды рубль менен эсептешүү чечими тууралуу айтып бергенин РИА Новости жазды.
"Европа биримдигинин өлкөлөрү эл аралык мыйзамдарды бузуу менен Россия банкынын валюталык резервдерин тоңдурганына байланыштуу эсептешүү тартибине өзгөртүү киргизилип жатат", — деп жазылган Кремлдин билдирүүсүндө.
Путин Шольц менен сүйлөшүп жатып кабыл алынган чечимдер Европанын россиялык газды импорттоочуларына кедергисин тийгизбеши керектигин белгилеген. Алар бул маселени мындан ары эки өлкөнүн эксперттери талкуулай тургандыгын макулдашкан. Россиянын президенти Италиянын премьерине ушул эле түшүндүрмөлөрдү берген.
Эске салсак, РФ президенти Владимир Путин 23-март күнү Россия кастык мамиледеги мамлекеттерге, тагыраагы, АКШ менен Европага газ менен россиялык товарларды алардын валютасында сатуу маанисиз экенин билдирген. Путин Борбордук банкка Европа менен эсептешүүлөрдү рублге өткөрүүгө бир жума, тагыраагы, 31-мартка чейин убакыт берген болчу.
Бирок Путиндин маалымат катчысы Дмитрий Песков 30-мартта Россия газын рубль менен сатып алуунун жаңы механизмдери дароо эле күчүнө кирбей турганын, буга убакыт керек экенин билдирди.