БИШКЕК, 31-мар. — Sputnik. Кышы бою токтоп турган автоунааны айдап чыгардан мурда мотор менен анын тегерегин жакшылап текшерип алуу керек. Бул тууралуу Россиянын улуттук автомобиль союзунун президенти Антон Шапарин Sputnik радиосуна билдирди.
"Көптөн бери жүрбөй турган автоунаалар көбүнесе келемиштердин "жатаканасына" айланат. Мындайда алар машинанын электр зымдарын кемирип салышат", — деди Шапарин.
Ошондой эле ал башка дагы көйгөйлөр жаралышы мүмкүн экенин эскертти.
"Эгерде унаа кышкысын гаражда эмес сыртта турса, кузовчуга көрсөтүп алган оң. Анткени жөнөкөй киши байкабаган жерлеринде коррозия пайда болушу мүмкүн. Анын баарын оңдотуп алып айдабаса кийин чоң көйгөйгө айланышы ыктымал", — деди адис.
Ошондой эле Шапарин көпкө чейин айдалбай турган автоунаанын мотор майын алмаштырып алган туура экенин кошумчалады.