Бишкек шаарында курулуп жаткан көп кабаттуу үйлөрдүн 37си мыйзамсыз тургузулуп жатат. Бул тууралуу Талантбек Иманакун уулу Sputnik Кыргызстан радиосунда маек куруп жатып билдирди.
Анын айтымында, мыйзамсыз курулган көп кабаттуу 12 үйдө эл жашоодо. Алардын иши боюнча сот процесстери жүрүп жатат.
"Учурда Бишкекте көп кабаттуу 410 үйдүн курулуш иши жүрүп, анын 37си мыйзамсыз тургузулууда. Мыйзамсыз курулган 12 үйдө эл жашап жатат. Алардын тагдыры сот аркылуу каралып, тиешелүү чечим чыгат. 2021-жылдын 12-февралында өкмөттүн токтомунун №38 жобосу менен Мамлекеттик техинспекцияга бардык 12 тармактагы көзөмөл функциялары берилген. Өкмөттүн реформасынын негизинде ошол милдеттер кийин жокко чыгарылып, тиешелүү министрликтерге бөлүштүрүлгөн. Былтыр 21-декабрда министрлер кабинети №310 токтомду кабыл алган. Эми мыйзамга ылайык, ошол токтомду Жогорку Кеңеш бекитип бериши керек", — деди Иманакун уулу.
Ошондой эле адис Бишкектеги көп кабаттуу үйлөрдүн сапатына жана коопсуздук маселелерине абдан көңүл бурулушу керектигин кошумчалады.