БИШКЕК, 29-мар. — Sputnik. КМШнын Парламенттер аралык ассамблеясы террорчулукка, чек арадагы кылмыштуулукка жана башка эл аралык коопсуздукка байланышкан коркунучтар менен чакырыктарга каршы күрөшүүгө олуттуу салым кошууда. Бул тууралуу Россия президенти Владимир Путиндин юбилейлик пленардык жыйындын катышуучуларына жолдогон куттуктоосунда айтылганын РИА Новости жазды.
Пленардык жыйын Алматыда өтүүдө. Путиндин текстин РФтин Федералык кеңешинин төрайымы, КМШ ПААнын кеңешинин башчысы Валентина Матвиенко окуп берген.
"Сиздерди Көз карандысыз мамлекеттердин шериктештигинин Парламенттер аралык ассамблеясынын 30 жылдыгы менен куттуктайм. Ассамблея шериктештиктин органдарынын системасында маанилүү орунду ээлейт. Көп тараптуу кызматташуунун натыйжалуу жана өтө керектүү түзүмү болуп саналат", — деп жазылган Путиндин текстинде.
Россиянын президенти шериктештикке кирген өлкөлөрдүн мыйзам чыгаруучу органдарынын ортосундагы тажрыйба алмашуу улуттук деңгээлдеги укуктук жөнгө салуунун натыйжалуулугун жогорулатканга жана интеграциялык процесстер үчүн шарттарды түзүүгө жардам бере турганын айткан.
"Акыркы жылдары Парламенттер аралык ассамблеянын алкагында экономикалык, социалдык жана гуманитардык тармактарда кызматташтыкты өнүктүрүү, ошондой эле коронавирус пандемиясынын кесепеттерин жоюу боюнча көп иш жасалды", — деп айтылган кайрылууда.
Ошондой Парламенттер аралык ассамблеянын өкүлдөрү КМШ аймагында өткөн шайлоолордо дайыма байкоочу катары катышып келери белгиленген.