БИШКЕК, 24-мар. — Sputnik. Кыргыз-тажик чек арасындагы соңку окуядан кийин Кыргызстандын Лейлек жана Тажикстандын Ганчи багыттары боюнча чек ара өкүлдөрү жолукту. Бул тууралуу УКМКнын Чек ара кызматы кабарлады.
Бүгүн, 24-мартта, кыргыз-тажик чек арасында асманга эскертүү иретинде ок атылган. Лейлек районуна караштуу Борбордук айылында чек арачылар УКМК кызматкерлери менен биргеликте кампалардын биринен пластик жүктөлгөн Hyundai-Porter үлгүсүндөгү автоунааны табышкан. Териштирүү үчүн машинаны чек ара заставасына жеткирүү чечими кабыл алынган. Кампанын ээси рулду башкарып, УКМКнын эки чек арачысы аны коштоп жөнөгөн. Арка-Борбордук айылына жеткенде айдоочу Тажикстандын 15-20 жараны топтошуп турган жерге автоунааны токтотуп качып кеткен. Тажикстандыктар Кыргызстандын чек арачыларын кармоого аракет жасашкан. Hyudai-Porter автоунаасынын артында келе жаткан "Жаңы жер" чек ара заставасынын жетекчиси асманга эки ирет эскертүү иретинде ок чыгарган. Тажикстандыктар кыргыз чек арачыларын кармап кала албаганы менен Калашников автоматы менен радиостанцияны алып кетүүгө үлгүрүшкөн.
Чек ара өкүлдөрүнүн жолугушуусу саат 18:50дө Арка-Борбордук транзиттик автоунаа жолунун аймагында өткөн. Ага эки тараптын укук коргоо органдарынын өкүлдөрү да катышкан.
"Жолугушуунун жыйынтыгында тажик тараптын жарандары кыргызстандык чек арачынын тартып алган АК-74 автоматын кайтарып берди. Ал эми радиостанция изделип жатканын айтты", — деп жазылган маалыматта.
Саат 21:00гө карата мамлекеттик чек аранын кыргыз-тажик тилкесиндеги кырдаал туруктуу деп мүнөздөлөт.
Жаңылыктарды кыска жана ыкчам окугуңуз келсе Telegram-каналыбызга катталыңыз.