БИШКЕК, 24-мар. — Sputnik. Министрлер кабинети социалдык-экономикалык чакырыктарга ыкчам чара көрүү боюнча 2022-жылга антикризистик чаралардын планын кабыл алды.
Бул планды ишке ашыруу үчүн болжол менен 126 миллиард сом талап кылынат.
Планга киргизилген чаралар 7 багыт менен каралган:
Азык-түлүк коопсуздугун камсыз кылуу жана артыкчылыктуу товарларга бааны турукташтыруу;
Социалдык колдоо жана иш менен камсыз кылуу;
Финансылык туруктуулукту камсыз кылуу;
Ишкер субъектилерди колдоо;
Инвестицияларды тартуу;
Товар жүгүртүүнүн көлөмүн көбөйтүү;
Мамлекеттик бюджеттин туруктуулугун камсыз кылуу.
"Өлкөнүн эгемендик тарыхында биринчи жолу антикризистик план каржылык ресурстар менен камсыздалып, декларативдүү мүнөздө эмес болууда. Дүйнөдөгү кырдаалды өзгөртө албайбыз, бирок өлкөнү кризистен алып чыгуу үчүн реалдуу чараларды көрө алабыз. Биз эң начар сценарийге даярбыз", — деди министрлер кабинетинин төрагасы Акылбек Жапаров.
Антикризистик чаралардын планына ылайык, социалдык жактан маанилүү товарларга баалардын кескин көтөрүлүшүнө жол бербөө жана аны жайгаруу үчүн товардык интервенциялар жүргүзүлөт. Ал үчүн өлкөнүн мамлекеттик материалдык резервине азык-түлүктү өз убагында сатып алуу камсыз кылынат.
Өндүрүш тармагында иш алып барган субъектилерге колдоо көрсөтүү үчүн чет элдик валютада алынган кредиттерди сомго конвертациялоо мүмкүнчүлүгү, ошондой эле товарларды жана тамак-аш азыктарын импорттоочуларды чет элдик валюта менен камсыздоо маселесин иштеп чыгуу каралууда.
Валюта курсунун олку-солкулугунан көз карандылыкты азайтуу үчүн өнөктөш өлкөлөр менен импорттук-экспорттук операцияларды улуттук валюта менен эсептешүү боюнча макулдашууларды түзүү жаатында сүйлөшүүлөр жүргүзүлөт.
Ата мекендик өндүрүш товарларына ички суроо-талаптын өсүшүн стимулдаштыруу боюнча чаралар көрүлөт.
Ошондой эле өлкөнүн мамлекеттик бюджетинин туруктуулугун камсыз кылуу боюнча чаралар каралууда. Республикалык бюджеттин айрым корголбогон беренелери кризиске каршы иш-чараларды каржылоо үчүн 30 пайызга чейин өзгөртүлөт.
Планда дыйкан-фермерлерге жеңилдетилген насыяларды берүү, жазгы талаа жумуштарын жүргүзүүдө дыйкандарды үрөн, жер семирткич, күйүүчү-майлоочу май менен камсыздоого көмөк көрсөтүү, ирригациялык курулуштарды оңдоого жана калыбына келтирүүгө каражат бөлүү камтылган.
Жаңылыктарды кыска жана ыкчам окугуңуз келсе Telegram-каналыбызга катталыңыз.