БИШКЕК, 22-мар. — Sputnik. Дүйнөнүн көпчүлүк өлкөлөрүндө "көрүнбөс омикрон" штаммы (stealth omicron) жайылып жатат. Бул тууралуу Саламаттыкты сактоо министрлиги билдирип, коронавирусту унутууга эрте экенин эске салды.
"Улуу Британияда даярдалган акыркы отчётто жаңы вариант баштапкы “омикронго” караганда 80 пайызга тез тарап жатат. "Көрүнбөс омикрон" деп аталганынын себеби, аны ПЦР-тест аныктай албай жатат же "дельтадан" айырмаланбайт", — деп айтылат билдирүүдө.
Адистер “омикрондун” жаңы варианты мурда ооругандарга жугуп, жөнөкөй “омикронго” салыштырмалуу катуураак өтүп жатканын айтууда.
Министрликтен билдиргендей, "көрүнбөс омикрон" штаммы Кыргызстанда каттала элек.
22-март күнү Кыргызстанда коронавирус жуктургандардын жалпы саны 200 826га жетти. Алардын арасынан 196 094ү сакайып кетти. 2 981 бейтап вирусту жеңе албай, өмүрү менен кош айтышты.
"Омикрон" штаммы 3,5 ай мурда Ботсвана менен Түштүк Африка Республикасынан табылган. Окумуштуулардын айтымында, анын S-белогунда ондогон мутация бар. Адистердин божомолу боюнча, штамм иммунитети начар адамдын организминде (ВИЧ менен ооруган) өнүккөн.
Дарыгерлер "омикрон" штаммын жуктургандар көбүнчө сасык тумоого кабылгандай болорун айтып, тамак, баш ооруп, мурун бүтөрүн белгилешкен.
Жаңылыктарды кыска жана ыкчам окугуңуз келсе Telegram каналыбызга катталыңыз.