Петропавловск шаарындагы ТЭЦ-2 комплексинин мору урап түштү. Бул туурасында Sputnik Казакстан жазды.
"Севказэнерго" компаниясынын маалымат кызматы ТЭЦтеги биринчи түтүк кулаганын билдирген.
"Азырынча чоо-жайы белгилүү эмес. Станцияда Өзгөчө кырдаалдар боюнча бардык кызматтар, өрт өчүрүүчүлөр, Тез жардам иштеп жатат. Адамдардын жабырланбагандыгын билүү иретинде тактоо башталды", — деген маалымат катчы Лилия Шерина.
Бул кырсыктан кийин бир кызматкердин кайда экени белгисиз болуп жаткандыгын Түндүк Казакстан облусунун прокуратурасы билдирген. Азыр ал кишини издеп жаткандыктары айтылды.
Ал эми интернетке кырсык болгон жерден тартылган видео тарады. Автор түтүк буу казандын чатырын сындырып кеткендигин, суу каптап жаткандыгын айткан.
Облустук саламаттык сактоо башкармалыгынын маалымат кызматынан түтүктүн ураганы боюнча маалымат саат 19:20да түшкөнүн билдирген. Жергиликтүү жашоочулардын үйлөрүнө барчу жылуулук да токтогон.
Петропавловск шаарындагы ТЭЦ-2деги быйылкы жылытуу мезгилиндеги үчүнчү олуттуу авария экендигин айтышты.
Энергетиктердин айтымында, ТЭЦти пайдалануу мөөнөтү эчак бүткөн. Бул комплекс 1961-жылы тургузулуп, электр кубаттуулугу 541 мегаватт, жылуулук бөлүп чыгаруусу саатына 713 гигакалорий деп эсептелген. Жабдуулардын бир бөлүгү жаңыланган. Жогорку чыңалууну көтөрө албай турган агрегаттардын да бар экендиги айтылды. Маалыматта жалпысынан алганда анын 75-80 пайызынын колдонуу мөөнөтү бүтүп, эскилиги жеткени кабарланды.