Аллергиялык тери оорулары иммундук жана нерв системаларынын реакцияларынын негизинде пайда болот. Аллерген менен алгачкы байланыштан кийин иммундук система ал жөнүндө маалыматты эстеп калат, башкача айтканда, организм бир эле антиген менен кайра-кайра байланышта болгондо тез жооп берүү үчүн жогорку сергектик абалына кирет (сенсибилизация). Бул учурда адамды эч кандай симптомдор тынчсыздандырбайт. Ал эми бул аллерген менен улам контакт боло берсе патологиялык иммундук процесс башталат. Бул тууралуу Кундузбек Тургунбеков Sputnik Кыргызстан радиосунда маек куруп жатып билдирди.
Анын айтымында, дене кычышып, териде папула, везикула, ыйлаакчалар, кызаруу жана шишик пайда болсо дарыгерге кайрылуу зарыл.
"Аллергиялык дерматоздор бул тери ооруларынын чоң тобу. Анын негизги себеби тышкы аллергендерге теринин аллергиялык реакциясы болуп саналат. Анын атопиялык дерматит, аллергиялык контактылык дерматит, экземанын ар кандай формалары, бөрү жатыш (крапивница), аллергиялык васкулит, токсикодермия жана башка түрлөрү бар. Оорунун пайда болушуна булганган айлана-чөйрө, химиялык заттар менен тез-тез байланышта болуу (турмуш-тиричилик каражаттары, синтетикалык кездемелер, оор металлдар, курулуш материалдары ж.б.), дары-дармек, консерванттар, жасалма витаминдер, фаст-фуд жана тамак-аш кошулмаларын көп колдонуу себеп болот. Андан тышкары, "аллергендик" кесиптер (медициналык, косметология, химиялык, курулуш жана тамак-аш секторлорунун өкүлдөрү) жана тукум куугучтук тенденциялар ооруну чакырат. Көбүнчө адамдарда аллергиялык дерматит, экзема жана атопиялык дерматит кездешүүдө. Алардын пайда болуу механизми толук изилденген эмес. Бул оору дайыма денеге аллергендер тийгенде козголору белгилүү. Аллергиялык дерматозду эмне кылып жана кантип дарылоо керектигин бир гана дарыгер аныкташы керек. Анткени туура эмес диагноз жана өзүн-өзү дарылоо ыкмалары ооруну өнөкөт формасына өткөрүп гана тим болбостон, субдепрессиялык жана жүрүм-турумдун бузулуусуна алып келет", — деди Тургунбеков.
Ал кишилер рецептсиз дары сатып алууну жана дарыкана өзү билип, сунуштап дары-дармек сатууну токтотуусу зарылдыгын кошумчалады.