БИШКЕК, 17-мар. — Sputnik. Соода-өнөр жай палатасы Башкы прокуратуранын аталган мекеменин вице-президенти Ш.К.А. кармалды деген маалыматы боюнча үн катты.
Кечээ башкы көзөмөл органы тарабынан Соода-өнөр жай палатасынын вице-президенти Ш.К.А. жана Д.Н.Э. аттуу жарандардын алдамчылык аракеттери боюнча козголгон кылмыш иши тергелип, биринчиси кармалып, экинчисине эл аралык издөө жарыяланганы кабарланган.
Буга чейин Соода-өнөр жай палатасынын сайтында Ш.К.А. инициалына дал келген Шатманов Канатбек Асылбекович аттуу киши вице-президент болгону тууралуу маалымат бар эле. Бирок ушул тапта ал өчүрүлгөн.
Аталган мекеменин билдиргенине караганда, Ш.К.А. (Шатманов) учурда вице-президент эмес. Ал бул кызматка коомдук башталышта дайындалган, тагыраагы, палатанын вице-президентине таандык ыйгарым укуктарга ээ эмес, анын ичинде Соода-өнөр жай палатасынын мурдагы вице-президенти деп айтканга дагы болбойт.
2021-жылы ноябрда президиумдун отурумунда Шатмановду коомдук башталыштагы вице-президенттиктен алуу сунушталган. Буга "Соода-өнөр жай палатасынын ишмердүүлүгүнө аралашпай калганы жана мекеме менен байланышты жоготкону" себеп болгон.
Ошондой эле палата Башкы прокуратурага маалыматка тактоо киргизүү сунушу менен кайрылды.