БИШКЕК, 15-мар. — Sputnik. Ички иштер министрлиги элге кайрылып, оңой жол менен киреше табууга үндөгөн каржы пирамидаларына азгырылбоого чакырды.
ИИМ өлкөдө жыл сайын он миңдеген жаран каржы пирамидалардын курмандыгы болуп жатканын белгилеп, мындай уюмдар элдин акчасына өнүгүп жатканын эскертти.
"Алдамчылар кыймылсыз мүлк, облигациялар жана акцияларды сатып алууну сунушташат, көп кирешелүү интернет-долбоорлорго, курулушка жана айыл чарбасына акча салууга убада беришет. Жогорку натыйжалуу өндүрүшкө инвестиция салууга үгүттөгөндөрү да бар. Көпчүлүк жабырлануучулар акчасынан кол жууганына моюн сунуп, эч кандай чара көрүшпөйт. Анын натыйжасында башка адамдарды алдоону улантууга өбөлгө түзүлүүдө. Эгер сиз алданып калсаңыз, мыйзам чегинде укугуңузду коргоого аракет кылыңыз", — деп айтылат маалыматта.
ИИМ мындай учурда ички иштер органдарына токтоосуз кайрылуу керектигин белгиледи.
Ошону менен бирге жарандарга мамлекеттик банктар жана ипотекалык компаниялар менен гана кызматташууну сунуш кылат.