БИШКЕК, 10-мар. — Sputnik. Хор ырдоо өнөрүн жайылтуу максатында "Достук — 2022" республикалык сынагы жарыяланды. Бул тууралуу Маданият, маалымат, спорт жана жаштар саясаты министрлиги кабарлады.
Сынак 12-15-май күндөрү өтөт. Конкурска катышуу үчүн арызды 28-апрелге чейин берүү керек.
"Сынак хор ырдоо өнөрүн жайылтуу, коомчулукту чыгармачылыктын бул түрү жана аткаруучулук чеберчилиги менен тааныштыруу, ошондой эле алардын репертуарын кеңейтүү, жаңы чыгармачылык байланыштарды түзүү жана тажрыйба алмашуу максатында өткөрүлүп жатат", — деп жазылган маалыматта.
Конкурстун байге фонду 800 миң сом. Алдыңкы үч орунду багындыргандарга диплом жана акчалай сыйлыктар берилет.
Катышууга арызды, чыгармалардын партитураларын, топтун жана дирижёрдун сүрөттөрүн ncc07@mail.ru электрондук почтасына жөнөтүү керек. Кошумча маалыматты министрликтин 0312 66-24-04 жана 0551 13 11 83 номерлери аркылуу алууга болот.