БИШКЕК, 10-мар. — Sputnik. Өзгөчө кырдаалдар министрлигинин маалымат кызматы 11-марттан тарта абанын температурасы төмөндөй турганын айтып, шашылыш билдирүү таратты.
Билдирмеге караганда, 15-мартка чейин Кыргызстандын көпчүлүк аймагында мезгил-мезгили менен жаан, тоо этектеринде жана тоолуу райондордо кар жаашы күтүлүүдө. Айрым жерлерде жаан катуу жаашы ыктымал.
"14-15-мартта абанын температурасы төмөндөп, тоо этектеринде жана тоолуу райондордо жолдор тайгак, тоңголок болот. Батыштан соккон шамалдын ылдамдыгы секундасына айрым жерлерде 15-20 метрге жетиши күтүлөт", — деп айтылат маалыматта.
ӨКМ мындай өзгөрмөлүү аба ырайы автоунаа, энергетика жана коммуналдык кызматтардын ишин жана жайыттарда мал кармоону кыйындатарын эскертти.