БИШКЕК, 10-мар. — Sputnik. Жогорку Кеңештин депутаты Жанар Акаев парламентте Россияга болгон авиабилеттин баасы 20-30 пайызга чейин өсүп, кээ бир авиакомпаниялар ишин токтотконун айтып, бул маселени чечүү жолдорун сурады.
Буга жооп берген экономика жана коммерция министри Данияр Амангелдиев бул убактылуу көрүнүш экенин айтты.
Экономика жана коммерция министри Данияр Амангелдиев
© Фото / пресс-служба Жогорку Кенеша
"Себеби лизинг компаниялардын баары Европа аймагында жайгашкан. Азыркы камсыздандыруучу компаниялар бир аз кымбатыраак болсо да, Азия жакка кетип баратат. Россия дагы жөн турган жок, алардын деле иш пландары бар бул боюнча. Бир жуманын ичинде учактардын баары кайра учуп баштайт деп ойлойм", — деди Амангелдиев.
Буга чейин транспорт жана коммуникация министринин орун басары Таабалды Тиллаев "Аэрофлот" авиакомпаниясы кийинки жумадан баштап Россия менен Кыргызстанга каттамга чыгууну убадалаганын билдирген.