БИШКЕК, 10-мар. — Sputnik. Саламаттык сактоо министри Алымкадыр Бейшеналиев көз микрохирургиясы боюнча жеке клиникага барып чуу салды.
Министр медборбор №2 клиникалык көп профилдүү оорукананын имаратынын корпусун бошотпой жатканына нааразы болгон.
Бейшеналиев фойеге кирип, жеке клиниканын өкүлдөрүнөн жакынкы аралыкта чыгып кетүүнү талап кылган. Буга кызматкерлердин бири "укуктук өлкөдө жашайбыз" деп жооп берди.
"Кетчи ары, укугуң менен сенин… 24 жылдан бери Кыргызстанды алдап жүрөсүңөр", — деп жооп берди министр.
Бейшеналиевди медборбордун жетекчиси Алмазбек Исманкулов менен телефон аркылуу байланыштырганда аны "лопух" деп кекетти. Министр буга чейин Исманкулов 10 күн сураганын, бирок аны алдап койгонун белгилеген.
"Сен Кыргызстанды 24 жылдан бери алдап келдиң, дагы уланткың келип жатабы? Бул жерде кыздар турат, болбосо ашата сөгөт элем. Имаратты бошотууга үч саат убакыт берем. Антпесе мени менен сүйлөшөсүң, көйгөй жаралат", — деди Бейшеналиев.
Айрым ЖМКлар Бейшеналиев жеке клиниканын өкүлүнүн "саркеч чачын" кыркып, "тишин бирден санап" коёрун айтканын жазышты.
Эске салсак, 18-февраль күнү Бишкек мэрия аталган медклиника менен келишимди бузуп, имаратты бошотууну талап кылган.