Айыл чарбасын толук көзөмөлдөй турган агрохолдинг керек. Ал айыл чарбасында алып-сатуу менен алектенип, процессти жүзөгө ашырса, министрлик ички жана тышкы саясатты колго алат. Бул тууралуу Турусбек Асаналиев Sputnik Кыргызстан радиосунда маек куруп жатып билдирди.
Анын айтымында, айыл чарбасына бөлүнгөн каражаттын көбү чет өлкөдөн жер семирткичтерди сатып алууга жумшалууда.
"Кыргызстандагы айыл чарбасынын ишин илгерилетүү жана иштетүүгө бизге агрохолдинг керек. Чет өлкөдөн кирген бардык продукцияны бир оператор ишке ашырса, абалга байкоо жүргүзүү туура жолго салынмак. Адистештирилген агрохолдинг айыл чарбасында алып-сатуу менен алектенип, ишти жүргүзүүнү жүзөгө ашырса, министрлик ички жана тышкы саясатты колго алат. Алсак, бюджеттен бөлүнгөн акчанын көбү жер семирткич сатып алууга жумшалып жатат. Өзүбүз аркылуу глауконит, трепел аттуу породаларды алууга мүмкүн. Мындан тышкары, тоодон жуулуп, суу сактагычтарда топтолгон ылайдан керектүү минералдык заттарды алса болот. Мисалы, Ала-Букада Илимдер академиясынын окумуштуулары изилдеп, глауконит, трепел породаларын аныктап, айыл чарбасында колдонууга кеңеш берүүдө. Фосфор, калий органикалык азык зат аркылуу жерди жакшыртууга шарт бар", — деди Асаналиев.
Ошондой эле адис айыл чарбасында илим изилдөөгө көңүл бурбаса, эч кандай жылыш болбой тургандыгын кошумчалады.