БИШКЕК, 7-мар. — Sputnik. Кыргызстандагы сегиз колледждин окуу имараттарын жана жатаканаларын реконструкциялоо иштери аяктоо алдында турат. Бул тууралуу Билим берүү жана илим министрлиги билдирди.
Маалыматка ылайык, колледждерде окуу кабинеттери, лаборатория, окутуучулар үчүн бөлмө, ашкана, жатакана, ажаткана жана эс алуу жайлары оңдолуп жатат.
"Жаңы окуу жылын студенттер жабдылган класстарда жана заманбап окуу-өндүрүштүк комплекстерде тосушат. Ден соолугунан мүмкүнчүлүгү чектелген студенттер үчүн шарт түзүүгө өзгөчө көңүл бурулууда. Жеткиликтүү чөйрөнү камсыздоо үчүн реконструкциялоодо чыгуучу жерлер, ажаткана, жашоо үчүн бөлмөлөр каралган", — деп айтылат маалыматта.
Окуу-өндүрүштүк комплекстерди түзүү үчүн тийиштүү жабдуулар коюлары белгиленди. Мисалы, Кара-Балта техникалык-экономикалык колледжинин базасында автоэлектрониканы оңдоочу устакана ачылат. Ал эми Бишкек архитектура жана курулуштагы менеджмент колледжинде эмерек жасоочу цех, имараттар үчүн желдетүүчү каналдарды чыгаруучу ишкана жана курулуш материалдарынын сапатын текшерүү үчүн лаборатория иштей баштайт.
Реконструкциялоо иштери Азия өнүктүрүү банкынын колдоосунда "Секторду өнүктүрүү программасы: инклюзивдик өсүү үчүн көндүмдөр" долбоорунун алкагында жүзөгө ашырылууда.
Долбоорго киргизилген пилоттук колледждердин тизмеси:
Бишкек архитектура жана курулуштагы менеджмент колледжи;
К. Скрябин атындагы Кыргыз улуттук агрардык университетинин Токмок колледжи;
С. Нааматов атындагы Нарын мамлекеттик университетинин Агроэкономикалык колледжи;
Жалал-Абад мамлекеттик университетинин Жалал-Абад колледжи;
Т. Кулатов атындагы Кызыл-Кыя тоо-кен техникалык колледжи;
Ош мамлекеттик университетинин Индустриалдык-педагогикалык колледжи;
Ысык-Көл индустриалдык-педагогикалык колледжи;
Кара-Балта техникалык-экономикалык колледжи.