БИШКЕК, 6-мар. — Sputnik. Тараздын жашоочусу Нурзат Калдыбаева бир нече жылдан бери эркек эмес аял экендигин далилдей албай келет. Бул туурасында Sputnik Казакстан "Хабар 24" телеканалына шилтеме берип жазган.
Ал телеканалга мындан төрт жыл мурда кетирилген документиндеги катаны азыркы күнгө чейин оңдото албай жатканын айтып берген.
"Документке ал Нурзат Талгатович Калдыбаев болуп жазылып, жынысы эркек деп көрсөтүлгөн. Нурзат Элди тейлеген борборго, ЗАГСка, төрөт үйүндөгү архивге кайрылганы менен эч ким жардам бере алган эмес. Азыр болочок эне ымыркайы төрөлгөндө туулгандыгы тууралуу күбөлүктөгү энеси деген жерге эмне деп жазыларына түйшөлүп жатканын айтып берди", — деп жазылган маалыматта.
Келин башынан эле аял экендигин айтканына тиешелүү тараптын өкүлдөрү ишенбегендигин баяндаган.
"Жынысымды аял деп оңдоткону келсем, ишенишкен жок. Балким алмаштырып, трансгендер болуп алгандырсың дешти. Кудай буюрса, үч айдан кийин төрөйм. Анда документке күйөөм атасы деп жазылып, анан мен да эркек деп жазыламбы", — деп тынчсызданган Калдыбаева.
Бул кырдаал боюнча Элди тейлөө борборунан түшүндүрүшкөн.
"Тамгадан ката кетип калат, аны оңдойбуз. Бирок мындай окуяга, тагыраагы эркек документин аял деп оңдотом деген окуяга биринчи ирет кез келип отурабыз. Башкысы, мыйзамдын негизинде оңдоп-түздөлүшү керек", — деген аталган бөлүмдүн башчысы Шалкар Елемес.
Маалыматта бул маселе кандай документтердин негизинде чечиле тургандыгы айтылган эмес.