БИШКЕК, 5-мар. — Sputnik. Президенттин администрациясынан Кыргызстан башчысы Садыр Жапаровго кантип кайрылуу, кат жолдоого болорун айтып беришти.
Электрондук кайрылуулар www.kattar.kg порталы аркылуу түшөт. Ар бир жаран президентке жана мамлекеттик башка органдарга кайрыла алат.
Мындан сырткары, Жапаровдун тапшырмасы менен 27-январдан тарта бейшемби күндөрү 8:30-9:30 аралыгында "Биринчи радионун" апталык берүүсү обого чыгат. Радиоугармандар мамлекет башчыга онлайн-тартипте кайрыла алат.
Администрацияда (0312) 62-53-85 – ишеним телефону менен катар эле президенттин жалпы кабылдамасынын номери (0312) 62-50-20 иштейт.
Булар менен катар эле министрлер кабинетинин төрагасынын – администрация жетекчисинин, анын орун басарларынын, мамлекеттик катчынын, аталган органдагы түзүмдүк бөлүктөрдүн да жарандарды кабыл ала турчу графиктери белгиленген.
"Андан сырткары, администрациянын элден келген кайрылуулар менен иштеген бөлүмү каттарды алып каттап, тизмелеп, кайрылуунун көз жаздымда калбай өз учурунда каралышына, системаланышына жана анализ жүргүзүлүшүнө көзөмөл жасайт. Муну менен катар эле аталган бөлүм президенттин администрациясынын алдына митингге, наразылыкка чыгып талап койгондор менен иштерди жүргүзөт", – деп кабарлашты.
2021-жылда президенттин дарегине жана анын администрациясына 22 546 кайрылуу келип түшкөнү айтылды.
Ал эми быйылкы жылдын башталышынан 4-мартка чейин 3 460 кайрылуу болсо, алардын 1 025и коомдук кабылдама аркылуу, ал эми 642си электрондук түрдө жасалган.