БИШКЕК, 5-мар. — Sputnik. Кыргызстандын тышкы иштер министри Руслан Казакбаев маалымат жыйыны учурунда РФ ТИМ башчысы Сергей Лавров менен болгон сүйлөшүүлөрдүн жыйынтыгы боюнча маалымат берди.
Ал 20-март күнү эки мамлекет дипломатиялык мамилелердин 30 жылдыгын белгилей турганын эске салды. Казакбаев Россия Кыргызстандын стратегиялык өнөктөшү экенин айтып, кызматташуу боюнча үч жылдык программага кол коюлганын белгиледи.
ТИМ жетекчисинин айтымында, эки өлкөнүн мамилеси 308 келишимдин, макулдашуунун жана башка документтердин базасында негизделген. Эң башкы документтердин бири – бул 1992-жылы кабыл алынган достук, кызматташуу жана жардам көрсөтүү жөнүндөгү келишим болуп саналат.
"Кыргыз-орус мамилелери географиялык жакындык менен гана эмес, маданий, тарыхый жана достук байланыштар менен аныкталган. Биз саясий диалог менен эки тараптуу байланыштын жогорку деңгээлин канааттануу менен белгилейбиз. Соода-экономикалык өкмөттөр аралык комиссия, илимий-техникалык жана гуманитардык кызматташуу маанилүү механизм бойдон калууда. Кезектеги дагы бир жыйынды өткөрүү маанилүү деп эсептейм", - деди Казакбаев.
Ал ошондой эле кыргыз-орус аймактар аралык конференциясынын иши жемиштүү болгонун айтып, пандемияга карабастан кээ бир багыттар боюнча соода жүгүртүү токтоп калбай, керек болсо күчөгөнүн белгиледи. Министр өлкөлөр ортосундагы соода жүгүртүү эки миллиарддан ашып, 46,5 пайызды түзгөнүн кошумчалады. Быйыл бул көрсөткүчтү 3 миллиард долларга жеткирүү пландалууда.
Казакбаев Кыргызстан Россиянын ар дайым көрсөтүп келген техникалык, финансылык жана гуманитардык колдоосун жогору баалай турганын белгиледи. Министр Кыргызстан мектептердин курулуш ишин чыдамсыздык менен күтүп жатканын айтып, бул нерсе орус тилин колдоого кошумча шарт түзөрүн белгиледи.
Министрлер Россияда иштеп жүргөн кыргызстандыктардын маселелери менен көйгөйлөрүн дагы талкуулашкан.
"Алардын тагдыры менен Россиядагы укуктук абалын эки өлкөнүн жетекчилери көз жаздымда калтырган жок. Биз ошондой эле медициналык көзөмөлдөн өтүү, кара тизме, миграциялык амнистиция боюнча жаралган кыйынчылыктарды дагы талкууладык", - деди ТИМ жетекчиси.
Казакбаев Лавровду Бишкекке каалаган ыңгайлуу учурда келип кетүүгө чакырды.