БИШКЕК, 4-мар. — Sputnik. Россиянын президенти Владимир Путин Украинадагы операцияда курман болгон аскерлердин үй-бүлөсүнө 7 миллион рублдан төлөнө турганын билдирди. РИА Новости жазгандай, өлкө башчысы РФтин Коопсуздук кеңешинин мүчөлөрү менен жыйын курду.
Анын айтымында, 5 миллион рубль өлчөмүндө кошумча төлөмдөр бекитилет.
“Украинадагы атайын операция учурунда курман болгон жоокерлердин үй-бүлөсүнө мыйзамда каралган камсыздандыруу боюнча бир жолу берилчү 7 миллион 421 миң рубль жөлөк пул төлөнөт. Мындан тышкары, үй-бүлө мүчөсүнүн ар бирине ай сайын акчалай компенсация берилип турат. Күч структурасында иштеген аскерлердин үй-бүлөлөрүнө кошумча 5 миллион рублдан бөлүү керек деп эсептейм”, — деди Путин.
Ал ошондой эле жаракат алгандарга жөлөк пул чегерилерин кошумчалады. Эгер контракт боюнча кызмат өтөп жаткан аскер жаракатынан улам эмгекке жараксыз деп табылса, ага бир жолу төлөнчү 2 миллион 968 миң рубль берилет. Эгер майып болуп калса ай сайын компенсация алып турат.
Президент жаракат алган күч структурасындагы жоокерлерге кошумча 3 миллион рубль төлөө маселесин кароо керектигин белгилеген.