БИШКЕК, 2-мар. — Sputnik. Жогорку Кеңештин депутаты Нурлан Шакиев улуу муундагы кишилердин кызматка дайындалышын сындаган коомчулукка нааразы болду.
Ал соңку учурда президенттин кадрдык тандоосу ич жылытарын айтып, Бишкек шаарынын мэрлигине Эмил Абдыкадыровдун келишин белгиледи. Бирок анын жаш курагына карап сындап жатканына токтолду.
"Коомдо 60 жаштан жогорку кадрларды кызматка алып келгенде "чалдар келе жатат, жаштар кетип жатат" деген сөздөрдү айтканды мода кылып алдык. Тескерисинче, өнүккөн өлкөлөрдө аткаруу бийлигинде көпчүлүгү улуу муундун өкүлдөрү экен. Коррупцияга аралашпаса, абийири таза болсо мурдагы жетекчилерди аткаруу бийлигине тартышыбыз керек. Акаевчил, бакиевчил, атамбаевчил, керек болсо жээнбековчул деген жарлыктардан арылышыбыз кажет. Өлкөбүз ынтымак-ырашкерликте өнүгүшү зарыл. Бизде кадрлар резерви жетишсиз болууда. Жаш курагына карабастан мурда ийгилик жараткандарды коркпой мамлекеттик кызматка тарталы. Учурда ар кандай себептерден улам аткаруу бийлигине барбай калышты, андыктан ал жакта иштөө эрдик", — деди Шакиев.
Ошондой эле ал үч өлкөнү мисал келтирди. Депутаттын айтымында, АКШда коргоо министри 68 жашта, айыл чарба министри 71 жашта, финансы министри 75 жашта. Бүт дүйнөнү экономикасы менен суктандырган Японияда премьер-министри 73 жашта, тышкы иштер министри 66, коргоо министри 62, финансы министри 81 жашта. Ал эми Кытайда премьер-министр 66, төрт вице-премьери 71, тышкы иштер министри 68, айыл чарба министри 68 жашта.