БИШКЕК, 2-мар. — Sputnik. Борбор калаанын бюджетине канча акча түшүп, анын ар бир тыйыны кайда жумшалып жатканын салык төлөөчүлөр билиши керек. Бул тууралуу Бишкек шаарынын мэри Эмилбек Абдыкадыров брифинг учурунда билдирди.
"Шаардын бюджети тууралуу маалымат ачык-айкын болушу шарт. Мен аны мэриянын коридоруна илип коюуну пландап жатам. Акча тууралуу журналисттер гана эмес, ар бир салык төлөөчү билиши керек", — деди мэр.
Калаа жетекчиси анын эшиги каалоочуларга ар дайым ачык экенин, ал эми ишемби күндөрү элди кабыл аларын эске салды. Ошондой эле шаарды өнүктүрүү боюнча мыкты сунуштар болсо, карап көрүүгө даяр экенин кошумчалады.