Асылбек Өзүбеков 1958-жылы 1-мартта Ысык-Көл облусунун Тору-Айгыр айылында жарык дүйнөгө келген. Ал орто мектепти аяктагандан кийин Ташкенттеги театр жана сүрөт көркөм институтунда билим алып, эмгек жолун Кыргыз мамлекеттик академиялык драма театрынан баштап, он жылдай актёр болуп иштеген. Андан соң 18 жыл "Тунгуч" театрында эмгектенип, "Боз салкын", "Апамдын махабаты" тасмаларында роль жараткан.
Жаштайынан ырга жакын чыгармачыл инсан музыкалык аспапта ойнойт. Обончу 1984-жылы алгачкы "Өмүр" деген ырын радиого жаздырып бат эле эл оозуна алынып, кийин "Фаридам", "Гүлдөй жан", "Отуз жаш" өңдүү 40ка жакын чыгарма жараткан. Чыгармаларынын көпчүлүгү сүйүү, арзуу темасында, ошондуктан аны "кайгылуу ырлардын рыцары" деп атап алышкан.
Рыспай Абдыкадыров атындагы сыйлыктын лауреаты азыр театрда иштеп, айылда багбанчылык менен алектенип, байбичеси менен эки кыз, эки уулду тарбиялап өстүргөн.