БИШКЕК, 28-фев. — Sputnik. АКШда альпинист Лиленд Ниски аскага чыгып бара жатканда көчкү жүрүп, 120 метр бийиктикте өмүр менен өлүмдүн ортосунда болгон күчүн жумшап асканын боорунда жабышып турган. Бул тууралуу LADBible жаңылыктар сайты жазган.
Спортчу бул учурдун видеосун Instagram тармагындагы баракчасына жүктөгөн.
Окуя Орей (штат Колорадо) муниципалитетинин аймагындагы Риббон чокусунда болгон. Америкалык спортчу коопсуздугун камсыздаган шаймансыз муз каптаган аскадан өйдө чыгууга аракет кылган.
Кадрдан жогорудан токтобой түшүп жаткан кардын алдында, асканын боорунда кишинин жан далбастап музду чагып, кармалып турууга илинчек издеп жатканын көрүүгө болот.
"Видеодон байкалбаптыр. Алды жагымда муз урчук болгондуктан көчкүнүн жакындап келе жатканын көрбөй калыптырмын. Урчукту кармаган колумду алмаштырып алайын дегенде кар түшө баштады. Бул өтө коркунучтуу болду", — деген Ниски.
Ал көчкү эки мүнөттөй тынбай жүрүп турганын, бул учурда 120 метр бийикте болгонун жазды.
"Кар бороондон улам көчтү окшойт. Үрөй учурган эле көрүнүш болду. Дем алуумду көзөмөлдөп, кар өзү менен кошо алып кетпесин деп, башымды ылдый кылып, аска менен аска болуп жабышып турганга аракеттендим", — деген ал.
Көчкү түшүп бүткөндөн кийин бир аз аярлап, альпинист андан ары жолун улап, 45 мүнөттө анын чокусуна чыккан.