Алдын ала жыйынтыкты Борбордук шайлоо комиссиясы жарыялайт. Ал автоматтык түрдө саноочу урналардын эсебине негизделген, андыктан шайлоонун акыркы жыйынтыгы деп таануу мүмкүн эмес.
Башында Боршайком 53 талапкерди каттаган. Биринчи май округунан 28, Свердлов районунан 25 адам өзүн көрсөткөн. Бирок добуш берүү күнүнө чейин саны кыскарып 50гө түштү. Ошентип эки округда тең 25тен талапкер ат салышты.
Добуш берүү күнү ар бир округдан 60тан шайлоо участкасы ачылып, жалпы 120 тилке иштеди. Ал эми 219 654 шайлоочу тандоо укугуна ээ болду, Биринчи май округунан — 113 105, Свердлов районунан — 106 549.
Кечээ имараттан сырткары добуш берүү өттү. Ден соолугуна же башка жүйөөлүү себептер менен шайлоо тилкесине келе албаган жарандар бир күн алды добуш берет.
Белгилей кетсек, 2021-жылдын 28-ноябрында Кыргызстанда Жогорку Кеңештин депутаттары шайланган. Добуш берүү жаңы система менен өтүп, 54ү партиялык тизме боюнча, 36сы бир мандаттуу округдан элдин элегинен өтүштү. Ал эми Биринчи май менен Свердлов округдарында эң көп добуш “баарына каршы” графасына берилген. Мындан улам кайра шайлоо дайындалган.